თბილისი (GBC) - ბიზნესმენ ავთო წერეთლის შვილი, ვატო წერეთელი,  “თბილისის თამბაქოში” წილების წართმევის საქმის თაროზე შემოდებაზე წერს.

„ი.ჩ-მ და ვ.ჩ-მ მაგ წლებში წარმატებული თამბაქოს წარმოება "პირველი" რომ გამომძალეს, ახალი ხელისუფლების პირობებში პროკურატურამ დაზარალებულად რომ მცნო და დაადგინა გამოძალვა, ნეტა როგორ დაამთავრეს პროკურატურამ და აწ გარდაცვლილმა სასამართლომ ეგ ამბავი? მაგას თუ მოიკითხავს ნეტა ვინმე,“ - დაწერა ვატო წერეთელმა  „ფეისბუქის“ პირად გვერდზე.

უნდა ვივარაუდოთ, რომ ი.ჩ და ვ.ჩ ირაკლი ჩუბინიშვილი და ბიზნესმენი ვანო ჩხარტიშვილი არიან.

„თბილისის თამბაქოს“ მფლობელობის თემა კი, საკმაოდ ბუნდოვანია. ოფიციალურად, ავთო წერეთელმა ეს კომპანია 2007 წელს გაასხვისა „კოპპელა ვინჩენს ლიმიტედზე“. „ 2007 წლის ბოლოს, ვანოს დავალებით, გიორგი ქავთარაძემ “კოპელას” სახელით განახორციელა წილის ნასყიდობის ხელშეკრულება, რომლის მიხედვითაც „კოპელამ“ „საქართველოს თამბაქოს წარმოებაში“ თავისი წილი 107 170 ლარად მიჰყიდა შპს „სონატა ალიანს ჯორჯიას“. 2008 წლის 3 ივნისს შპს „სონატა ალიანს ჯორჯიამ“ „საქართველოს თამბაქოს წარმოების“ წილები მიჰყიდა „სმარტ გრუპს“, რომლის 51%-ს ფლობს ჩხარტიშვილი, ხოლო 49%-ს მისი შვილი - მიხეილ ჩხარტიშვილი“, - წერს ჯორჯიან პრესი.

ამის შემდეგ კვლავ საინტერესოდ განვითარდა მოვლენები 2011 წელს  სასამართლოს წესით, ნასყიდობისა და სასესხო ვალდებულებების ბათილად ცნობის გზით, ავთო წერეთელმა 100%-იანი წილი უკან დაიბრუნა. თუმცა ამ გადაწყვეტილებიდან რამდენიმე დღეში, 25 აპრილს ავთო წერეთელმა სარჩელზე უარი თქვა და განაცხადა, რომ დავაზე ინტერესი აღარ გააჩნდა.  კომპანიის 85%-იანი წილის მფლობელად ჩხარტიშვილთან აფილირებული „სმარტ ჯგუფი“ გახდა  15% დარჩა თენგიზ ფერაძეს. ამ 15 %-ის მფლობელად 2012 წლიდან უკვე ავთო წერეთელია მითითებული.

შეგახსენებთ, ავთო წერეთელის კომპანიებმა საზოგადოების ყურადღება თიბისი ბანკის საქმით მიიპყრო.

პროკურატურა აცხადებს, რომ 11 წლის წინ თიბისიდან 17 მლნ დოლარის სესხი გაიტანეს ბიზნესმენთან აფილირებულმა კომპანიებმა „სამგორი თრეიდმა“ და შპს „სამგორი M”-მა, რომელიც მამუკა ხაზარაძესა და ბადრი ჯაფარიძეზე გადასესხდა. მალევე 2008 წლის ბოლოს ბანკმა, აღნიშნული სესხები, ჩამოწერა და გარე საბალანსო ანგარიშზე გადაიტანა, ხოლო 2012 წელს ვალდებულებები  ოფშორულ კომპანიაზე გადავიდა.