თბილისი (GBC) - ირლანდიური “ლოუკოსტერი”  Ryanair-ი იმ 9 ნახშირზე მომუშავე  თბოელექტრო სადგურთა რიცხვს დაემატა, რომლებიც ევროკავშირში ჰაერს ყველაზე მეტად აბინძურებენ.

Avianews -ი წერს, რომ ავიაგადამზიდავმა Ryanair-მა, რომელიც წლის განმავლობაში 130 მლნ მგზავრს ემსახურება, 2018 წელს გარემოში 9.9 მეგატონა გამონაბოლქვის ემისია მოახდინა. არსებული მაჩვენებლებით, კომპანიამ 2018 წელს ჰაერში 6.9%-ით მეტი ნახშირორჟანგი გამოყო, ვიდრე 2017 წელს. უნდა აღნიშნოს, რომ Ryanair-ის მიერ 2018 წელს ემისირებული გამონაბოლქვი 5 წლის წინანდელ მაჩვენებლებთან 49%-ითაა გაზრდილი.

„რაც შეეხება კლიმატს, Ryanair-ი – ეს ახალი ნახშირია. ეს ტენდენცია შენარჩუნდება მანამ, ვიდრე ევროპა არ მიხვდება, რომ ეს არასრულყოფილად რეგულირებული სექტორი შესაბამისობაში უნდა იყოს მოყვანილი: დაწყებული საავიაციო ნავთის გადასახადიდან და წესების შემოღებიდან, რომელიც აიძულებს ავიაკომპანიებს გადავიდნენ ისეთი ტიპის საწვავის მოხმარებაზე, რომელსაც ნულოვანი გამონაბოლქვი აქვს”, - განაცხადა ევროპის ტრანსპორტისა და გარემოს დაცვის ფედერაციის მენეჯერმა ენდრიუ მერფმა.

როგორც ცნობილია, ავიაციის წილი ევროპაში სათბური გაზების გამოყოფაში 3%-ს შეადგენს. არსებული პროგნოზით კი 2050 წლისთვის ეს მაჩვენებელი შესაძლოა 700%-მდე გაიზარდოს.

მერფიმ ავიაციას “ევროპის ყველაზე დიდი კლიმატური მარცხი” უწოდა.