თბილისი (GBC) - Georgian Airways და Myway Airlines რუსული ავია-სანქციებით დაზარალებულებს ბილეთის ღირებულებას  უბრუნებენ ან ალტენატიულ მარშრუტს სთავაზობენ- სამოქალაქო ავიაციის სააგენტოს ცნობით, ქართული ავიაკომპანიები სრულფასოვნად და დადგენილ ვადებში ახორციელებს მგზავრების მიმართ არსებულ ვალდებულებებს. სააგენტოს მხრიდან, ამ მიმართულებით მონიტორინგი მიმდინარეობს.

ავიაკომპანიების წამომადგენლებთან დღეს შეხვედრაც გაიმართა, სადაც  8 ივლისიდან, რუსეთის ფედერაციის მიერ, ორ ქვეყანას შორის საჰაერო მიმოსვლის შეწყვეტის თაობაზე მიღებული ცალმხრივი გადაწყვეტილების შედეგად შექმნილი ვითარებას და ავიაკომპანიების წინაშე მდგარი გამოწვევები განიხილეს.

სამუშაო შეხვედრაზე მხარეებმა ასევე განიხილეს ავიაკომპანიების სამომავლო გეგმები როგორც ალტერნატიული მიმართულებების მოძიების, ისე კომერციულად მიმზიდველ ახალ მარშრუტებზე ოპერირების დაწყების კუთხით.

სამოქალაქო ავიაციის სააგენტოს მხრიდან გამოითქვა მზადყოფნა, ხელი შეუწყოს ქართულ ავიაგადამზიდველებს შესაბამისი ქვეყნების საავიაციო ხელისუფლებებთან შუამდგომლობის გაწევის და უფლებამოსილების ფარგლებში, პროცედურული საკითხებში დახმარების აღმოჩენის კუთხით.