თბილისი (GBC) –  სებ-ის ვიცე-პრეზიდენტი ლარის გაუფასურების მთავარ მიზეზზე აცხადებს. შიდა დესტაბილიზაციაზე,, - "გაუფასურების წამომწყები ივნისის მოვლენები იყო, რამაც ლარის მიმართ ნდობა საკმაოდ დააგდო", - პაპუნა ლეჟავას თქმით ამან გაუფასურების მოლოდინი გააჩინა.

"ტურისტულ შემოდინებებში არის კლება, თუმცა ის მიმდინარე ანგარიშის დეფიციტის გაუმჯობესებით, გარკვეულწილად დაბალანსებულია", - სებ-ის ვიცე-პრეზიდენტი  ფუნდამენტური ფაქტორების გაუმჯობესებაზე ამახვილებს ყურადღებას.

"გაზრდილია ექსპორტი, შემცირებულია იმპორტი. ფუნდამენტურად ჩვენ იმის საფუძველი გვაქვს, რომ ვივარაუდოთ, ლარი რაღაც პერიოდში აუცილებლად გააგრძელებს გამყარებას. თუმცა მეორე, ასევე მნიშვნელოვანი ფაქტორი, ბაზრის მოთამაშეების მოლოდინებია. ესეც თავის მხრივ, კურსში აისახება",  - აღნიშნა ლეჟავამ.

ფუნდამენტური ფაქტორებით ლარის კურსი 2.7-2.8 დერეფანში რომ უნდა იყოს და არა არსებულზე- $1 /₾2,98-2.99, ამას სისტემური ბანკის მმართველებიც ადასტურებენ. 

საქართველოს ბანკის CEO-ს, არჩილ გაჩეჩილაძის თქმით, ლარზე საგარეო ფაქტორების ზეგავლენა, პირიქით, მისი გამყარებისკენ არის. ტურისტული ნაკადის ზრდა შემცირებულია, თუმცა გავლენა არც აქედანაა. ლარს მხოლოდ და მხოლოდ შიდა ფაქტორი აუფასურებს - ბაზრის მოლოდინების და  ეროვნული ვალუტის მიმართ ნდობის დაკარგვა.

სებ-მა  ბაზრის დასარწმუნებლად 1 აგვისტოს გამოიტანა და $32.8 მლნ გაყიდა. დღესაც $40 მლნ გამოაქვს.