თბილისი (GBC) - „გარდაბნის თბოსადგური 2“ –მა საცდელი წარმოება დაიწყო.

ესკომ თბოსადგური უკვე დაარეგისტრირა საბითუმო ბაზრის მონაწილედ, როგორც როგორც ელექტროსადგური საცდელი გაშვების ან/და კომპლექსური გასინჯვის პერიოდში.

კომბინირებული ციკლის თბოსადგურის სიმძლავრე 230 მეგავატია და ის „გარდაბნის თბოსადგური 1“ -ის ანალოგია.  

ამ თბოელექტროსადგურს აქვს  ე.წ  ,,ნულიდან’’ გაშვების ფუნქცია, რაც იმას ნიშნავს, რომ ქვეყნის ელექტროსისტემაში სიმძლავრის არარსებობის დროს შესაძლებელი იქნება ელექტროსისტემისგან დამოუკიდებლად სადგურის გაშვება.

ორივე სადგურში ჯამში 389 მლნ დოლარის ინვესტიცია ჩაიდო.  ერთის მშენებლობა საპარტნიორო ფონდმა და ნავთობისა და გაზის კორპორაციამ, მეორეს კი, სრულად კორპორაციამ დააფინანსა. 

აღსანიშნავია, რომ ნავთობისა და გაზის კორპორაცია  მესამე კომბინირებული ციკლის თბოსადგურის აშენებას გეგმავს. თბოსადგურის სავარაუდო  სიმძლავრე 250 მეგავატი იქნება.