თბილისი (GBC) - ევროკავშირში პროდუქციის გატანით დაინტერესებული კომპანიების რაოდენობა იზრდება.

ეკონომიკის მინისტრის მოადგილის მონაცემებით, ექსპორტს ამ დროისთვის ევროკავშირში 800-ზე მეტი კომპანია ახორციელებს.

ირაკლი ნადარეიშვილის თქმით, მთლიანობაში ქართული ექსპორტი ევროკავშირის ქვეყნებში 13%-ით არის გაზრდილი, ხოლო 2014 წლიდან, როდესაც გაფორმდა თავისუფალი ვაჭრობის ხელშეკრულება, ჯამურად ქართული ექსპორტიორი კომპანიების რაოდენობა 44%ით.

„ევროკავშირთან თავისუფალი სავაჭრო ხელშეკრულების იმპლემენტაციის ერთ-ერთი მნიშვნელოვანი ფაქტორია ისეთი პლატფორმების არსებობა, როგორიც არის  ევროკავშირი-საქართველოს ბიზნესსაბჭო,  რომელიც, წლების განმავლობაში, წარმატებულად  მუშაობს ქართული და ევროპული ბიზნესის დაახლოებასა და ინტეგრაციაზე,“ - განაცხადა ნადარეიშვილმა „თბილისი მარიოტში“ ევროკავშირი-საქართველოს ბიზნესსაბჭოს წევრთა წლიურ კრებაზე.

ნადარეიშვილმა ამ მიმართულებით სახელმწიფოს როლსა და აქტივობაზეც აღნიშნა. „მნიშვნელოვანია, რომ DCFTA-ს ფარგლებში 125-ზე მეტი ევროდირექტივის აპროქსიმაცია მოხდა, რაც უზრუნველყოფს იმას, რომ ქართულმა ბიზნესმა და სახელმწიფომ უფრო მეტი სარგებელი მიიღოს ევროკავშირთან ღრმა და ყოვლისმომცველი თავისუფალი სავაჭრო ურთიერთობებიდან“ - განაცხადა ეკონომიკისა და მდგრადი განვითარების მინისტრის მოადგილემ.