თბილისი (GBC) - აშშ–ის ელჩმა აზერბაიჯანში ლი ლიტცენბერგმა ერთ–ერთ პრიორიტეტულ ამოცანად დაასახელა გაზის სამხრეთის დერეფნის განვითარება, კასპიის ზღვაზე გაზის ნაკადების გაფართოება და გაზსადენების ინფრასტრუქტურის უსაფრთხოების უზრუნველყოფა.

ელჩმა ბაქოში გამართულ სიმპოზიუმზე, რომელიც აზერბაიჯანის, საქართველოსა და თურქეთის საერთაშორისო უსაფრთხოების საკითხებს მიეძღვნა ენერგეტიკის მიმართულებით, განაცხადა: „ამერიკის შეერთებული შტატები ენერგოუსაფრთხოებას ნაციონალური უსაფრთხოების რანგში განიხილავს. ეს ეხება როგორც კავკასიას, ისე დანარჩენ ევროპას და თვით შეერთებულ შტატებსაც“.

ელჩის თქმით, ენერგეტიკის მოშლა მასობრივ და დამღუპველ შედეგებს გამოიღებს. ტექნიკური გაუმართაობა, სტიქიური მოვლენები, საბოტაჟი ან უცხოელი მიმწოდებლების მიერ მიღებული გადაწყვეტილებები – ამ ყველაფერს პრობლემების გამოწვევა შეუძლია. „ეს კი მიგვითითებს, დავიცვათ კრიტიკულად მნიშვნელოვანი ინფრასტრუქტურები და შევქმნათ გაზის გლობალური ბაზარი“, – აღნიშნა ელჩმა.

„გაზის სამხრეთის დერეფანი“ ევროკავშირისთვის პრიორიტეტული პროექტია, რომლითაც აზერბაიჯანული საბადოებიდან საქართველოსა და თურქეთის გავლით ევროპაში ყოველწლიურად 10 მლრდ კბ/მ ბუნებრივი გაზი უნდა გადაიტუმბოს.