თბილისი (GBC) - „თბილსერვის ჯგუფი“ ნაგვის კონტეინერებს შიდა ქუჩებიდან ცენტრალურ ან მეორად ქუჩებზე გადაიტანს. საპილოტე პროექტის განხორცილება კომპანიამ უკვე დაიწყო.

ოპტიმიზაციას 4 000-მდე ნაგავშემკრები კონტეინერი დაექვემდებარება.

პროექტის ფარგლებში, შიდა ეზოების მორეცხვა და ნაგავშემკრები კონტეინერების დასუფთავებაც დაიწყო.

"საპილოტე რეჟიმში ერთვება დედაქალაქის ყველა რაიონის შიდა ეზო, სადაც ნაგავმზიდი მანქანის შესვლა საცობს წარმოქმნის. პროექტის მიზანია, აღმოიფხვრას ისეთი პრობლემები, როგორებიცაა: ხმაური, უსიამოვნო სუნი და საცობი. ამ ეტაპზე, შიდა ეზოებიდან უკვე 500-მდე ნაგავშემკრები კონტეინერია გამოტანილი. მოსახლეობისგან საკმაოდ დადებითი გამოხმაურება გვაქვს, რაც გვაძლევს იმის თქმის საფუძველს, რომ პროექტი წარმატებით მიმდინარეობს“, - განაცხადა კომპანიის ხელმძღვანელმა რომეო მიქაუტაძემ.