თბილისი (GBC) - აგვისტოში ქვეყანაში შემოსული ფულადი გზავნილების ნაკადების მოცულობამ $184.2 მლნ (566.2 მლნ ლარი) შეადგინა, რაც 25.8%-ით (37.8 მლნ აშშ დოლარით) მეტია 2019 წლის აგვისტოს ანალოგიურ მაჩვენებელზე.

უცხოეთიდან საქართველოში ფულადი გზავნილების 95.1% იმ 19 უმსხვილეს პარტნიორ ქვეყანაზე მოდის, საიდანაც ასეთი გზავნილების მოცულობამ აგვისტოში 1 მლნ აშშ დოლარს გადააჭარბა. იმავე 19 ქვეყანაზე გასული წლის აგვისტოში მთელი ფულადი გზავნილების 93.4% მოდიოდა.

ფულადლი გზავნილების მოცულობა მნიშვნელოვნადაა გაზრდილი ევროკავშირიდან და 74,53 მლნ–ს შეადგენს, რაც მთლიანი გზავნილების 40,46%–ა. ეს მაჩვენებელი 2019 წლის აგვისტოსთან შედარებით 33,34%–ითაა გაზრდილი. ამ ფონზე შემცირებულია რუსეთიდან შემოსული გზავნილების მოცულობა, რამაც აგვისტოში $34,94 მლნ შეადგინა. კლებამ წინა წლის აგვისტოსთან შედარებით 1,48% შეადგინა.

მნიშვნელოვნად გაიზარდა ფულადი გზავნილების ნაკადი აშშ–დან – +45,8% (ჯამში $22,05 მლნ).

ფულადი გზავნილები პროცენტულ გამოსახულებაში ყველაზე მეტად აზერბაიჯანიდან და უკრაინიდან გაიზარდა, შესაბამისად  269,82% და 187,06%. ყველაზე მეტად შემოდინებები პროცენტულად ყაზახეთიდან შემცირდა –36,35% და ფულად გამოსახულებაში $1,63 მლნ შეადგინა.

ევროკავშირის ხუთეული

ევროკავშირის ქვეყნებს შორის დონორთა ხუთეულში პირველ ადგილზეა იტალია ($27,95 მლნ), მეორე ადგილს საბერძნეთი იკავებს ($20,64 მლნ), მესამეზე გერმანიაა ($6,86 მლნ), მეოთხეზე ესპანეთი ($5,11 მლნ), ხოლო პირველ ხუთეულს საფრანგეთი კრავს $2,81 მლნ–ით.

2020 წლის აგვისტოში საქართველოდან საზღვარგარეთ 23.1 მლნ აშშ დოლარი (71.1 მლნ ლარი) გადაიგზავნა, რაც 2019 წლის აგვისტოს (19.0 მლნ აშშ დოლარი) ანალოგიურ მაჩვენებელთან შედარებით 21.5%-ით მეტია.