თბილისი (GBC) - TBC Capital-ის ინფორმაციით, 2021 წლის მარტში საბანკო სესხების წლიური ზრდის ტემპი 0.6 %-ული პუნქტით შემცირდა და გაცვლითი კურსის ეფექტის გამოკლებით, 7.8% შეადგინა (y.y).

კლების ძირითადი მიზეზი კორპორატიული დაკრედიტების უფრო დაბალი ზრდა იყო, რომელიც თებერვალში +5.7%-ის შემდეგ (y.y), +3.5%-ით განისაზღვრა (y,y) გაცვლითი კურსის ეფექტის გამოკლებით.

ამავე პერიოდში, საცალო დაკრედიტების ზრდის ტემპიც შენელდა და 8.4% შეადგინა. კორპორატიული და საცალო სეგმენტისაგან განსხვავებით, მარტში MSME დაკრედიტების ზრდის ტემპი 2.2 %-ული პუნქტით გაიზარდა და 12.6%-ით განისაზღვრა (y.y).

ვალუტების ჭრილში, ლარში გაცემული სესხების ჯამური ოდენობა 17.4 მლრდ ლარს (y.y +20.4%), ხოლო უცხოურ ვალუტაში დენომინირებული სესხების ჯამური მოცულობა 21.7 მლრდ ლარის ექვივალენტს (y.y -1.1% / კურსის ეფექტის გამოკლებით ) გაუტოლდა.

TBC Capital-ის განცხადებით, მარტის განმავლობაში ლარსა და უცხოურ ვალუტაში გაცემული სესხების საპროცენტო განაკვეთებს შორის სხვაობა შემცირდა, რადგან განაკვეთი ლარის სესხებზე m.m 0.1 პპ-ით (15.2%-მდე) შემცირდა, ხოლო უცხოურ ვალუტაში გაცემული სესხების საპროცენტო განაკვეთი უცვლელად 6.5%-ზე შენარჩუნდა.

რაც შეეხება საბანკო დეპოზიტებს, მარტში 21.5%-ით გაიზარდა  (y.y) და 37 მლრდ ლარს გაუტოლდა (კურსის ეფექტის გამოკლებით).

ლარის დეპოზიტებმა - 13.4 მლრდ (+35.2% y.y), ხოლო უცხოურ ვალუტაში დენომინირებულმა დეპოზიტებმა 23.6 მლრდ ლარის ექვივალენტი (+14.7% y.y) შეადგინა.

შედეგად, ლარის დეპოზიტების წილი მთლიან დეპოზიტებში 36.4% იყო.

ეროვნული და უცხოური ვალუტების დეპოზიტების საპროცენტო განაკვეთებს შორის სხვაობა m.m 0.6 პპ-ით გაიზარდა, რაც ეროვნულ ვალუტაში განაკვეთის m.m 0.15 პპ-ით ზრდამ, ხოლო უცხოურ ვალუტაში m.m 0.43 პპ-ით კლებამ განაპირობა.

შეგახსენებთ, 28 აპრილს გამართულ მპკ-ის სხდომაზე სებ-მა რეფინანსირების განაკვეთი 100 საბაზისო პუნქტით, 9.5%-მდე გაზარდა. ჯერჯერობით, სებ-მა ინფლაციის პროგნოზი 6.5%-ზე დატოვა, ისევე როგორც ეკონომიკის ზრდის პროგნოზი 4%-ზე.