თბილისი (GBC) - პურის მცხობელთა ასოციაციის თავმჯდომარის მალხაზ დოლიძის განცხადებით, ახალ წლამდე პური არ გაძვირდება, თუმცა მომავალი წლიდან ფასები შესაძლოა 5-10 თეთრით გაიზარდოს.

„ტონა ხორბლის ფასი ბოლო ერთ კვირაში საერთაშორისო ბაზრებზე $320-დან $350 მდე გაიზარდა. იზრდება ყველა იმ კომპონენტის ფასიც, რაც პურის მისაღებადაა საჭირო. შესაბამისად, არაა გამორიცხული, რომ პურის ფასი შეიცვლება, თუმცა არა დრამატულად. შემიძლია ვთქვა, რომ უახლოეს მომავალში არ ვპროგნოზირებ პურის გაძვირებას“,- განაცხადა დოლიძემ.

მისი თქმით, არსებულ სიტუაციაში ერთადერთი სწორი გამოსავალი ხორბლის ადგილობრივი წარმოების გაზრდაა. დოლიძის შეფასებით, პრობლემას ქმნის ის გარემოებაც, რომ რუსეთმა ხორბალზე საბაჟო გადასახადი $67 დოლარამდე გაზარდა და შესაბამისად ამან ფქვილის ფასიც გაზარდა. დოლიძის ინფორმაციით, დღეისათვის 1 ტომარა პირველი ხარისხი ფქვილი საქართველოში 72 ლარი, ხოლო უმაღლესი ხარისხის 90 ლარი ღირს.