თბილისი (GBC) - ონლაინ კაზინოებს I ეტაპზე  გადასახადები  გაეზრდება,  რეკლამა აეკრძალება და 25 წლამდე პირი ვეღარ ითამაშებს, - მთავრობის ორშაბათის სხდომაზე პრემიერმა განაცხადა, რომ ონლაინ-კაზინოების მეშვეობით 1.5 მილიარდი ლარი გაედინება ქვეყნიდან.

„ონლაინ კაზინოების საკითხი თითოეულ მოქალაქეს ძალიან აწუხებს. ახალგაზრდები ყოველ დღე თამაშობენ და აგებენ. დიდი ნაწილი - 99% არის გაჭირვებული მოსახლეობა, ისინი, რომლებიც არ მუშაობენ. მე ვასაუბრე ეკონომიკურ გუნდს. ფინანსთა მინისტრს უკვე აქვს ხედვა. მინისტრი წარადგენს საკანონმდებლო ინიციატივას, რომელიც გულისხმობს გადასახადების გაზრდას ონლაინ კაზინოების მფლობელებისათვის. მათი აბსოლუტური უმრავლესობა უცხოური კომპანიაა და საუბედუროდ, ჩვენი მოქალაქეების ფული გაედინება უცხოეთში", - განაცხადა ირაკლი ღარიბაშვილმა. 

II ეტაპზე,  საერთოდ აიკრძალება ონლაინ-კაზინოები. ეს ხედვა აქვს პრემიერს, როგორც თავად თქვა და საზოგადოების მხარდაჭერის იმედიც აქვს.

ქვეყნის საწარმოო ბრუნვის 1/3 სათამაშო ბიზნესზე მოდის

 წლიური სტატისტიკით, ეკონომიკაში გართობის ინდუსტრიას მეტი წილი აქვს, ვიდრე მრეწველობას და მშენებლობას, ერთად.

 ბიზნეს-სექტორის ბრუნვის 23,8% მოდის გართობის ინდუსტრიაზე (2018 - 16%), მაშინ, როდესაც მრეწველობაზე 9,6% (10,6%) , მშენებლობაში 7,6% (8,3%). გართობის ინდუსტრია მე-2 ადგილზეა, პირველზე კი - ვაჭრობა - 39,4% (L/Y43%).