თბილისი (GBC) - Georgia Capital –ის (GCAP) განცხადებით, განახლებადი ენერგია და განათლება - ეს მათი მთავარი საინვესტიციო მიმართულებებია საშუალოვადიან პერიოდში.

მათივე თქმით, იდენტიფიცირებულია ჯამური წმინდა ინვესტიცია $50 მლნ-ის ოდენობით, GCAP-დან მომდევნო 3-5 წლის განმავლობაში, სწორედ განახლებადი ენერგიისა და განათლების ბიზნესებში. აქედან $10 მლნ კი 2021 წელს.

GCAP-ის თქმით, 2021 წელს ძლიერი ფულადი ნაკადების წარმოქმნის გათვალისწინებით, თანდათან რეინვესტირების ფაზაზე გადადიან, საინვესტიციო ეტაპზე მყოფი პორტფელის კომპანიებში.

მათ შორის, საინვესტიციო კომპანიამ 9M21-ში უკვე დახარჯა 17.1 მლნ ლარი, აღნიშნული ორი მიმართულების განვითარებაში. მ.შ 6.5 მლნ ლარი 3Q21-ში.

მათ შორის, 3.7 მლნ  ლარი გამოიყო განახლებად ენერგეტიკაზე მილსადენის ჰესების (დარჩი და ზოთი) და ქარის ელექტროსადგურების განვითარებისთვის.

12.8 მლნ ლარი გამოიყო საგანმანათლებლო ბიზნესისთვის - ბაქსვუდის არსებული კამპუსის (საშუალო სეგმენტი, 3.2 მლნ ლარი) შესაძლებლობების გაფართოებისთვის, მიწის შესყიდვისა და ახალი კამპუსის მშენებლობისთვის, მწვანე სკოლის არსებული კამპუსის შესაძლებლობების გაფართოებისთვის (ხელმისაწვდომი სეგმენტი, 5.7 მლნ ლარი) და ქართულ-ავსტრიული სკოლა „ფესვების“ 81% წილის შეძენისთვის (3.9 მლნ ლარი).

ცნობისთვის, GCAP-ს აქვს ფესვებიდან  9%-იანი წილის  გამოხმობის უფლება (ე.წ Call Option)  2022 წლის აგვისტოდან დაწყებული 12 თვის განმავლობაში.

GCAP-ი ჩვეულებრივ, თავისი ინვესტიციიდან მონეტიზაციას, საწყისი ინვესტირებიდან 5-10 წლის განმავლობაში ელის.