თბილისი (GBC) - სარესტორნო ბიზნესის წარმომადგენლები ძირითადად მიესალმებიან მთავრობის გადაწყვეტილებას კოვიდ-პასპორტების გაუქმებასთან დაკავშირებით, თუმცა, არსებობს განსხვავებული აზრიც.

რესტორატორთა ნაწილი პირიქით, მიიჩნევს, რომ დღევანდელ ვითარებაში კოვიდ-პასპორტების გაუქმება ბიზნესს პირიქით დააზარალებს.

„ეს ძალიან ცუდი და უდროო გადაწყვეტილება, რომელიც სარესტორნო ბიზნესს კიდევ უფრო დააზარალებს, რადგანაც დღეიდან კანონმორჩილი ადამიანები, რომლებმაც ვაქცინაციაც გაიარეს, და კოვიდ-პასპორტებიც აიღეს, რესტორნებში არ ივლიან, იმიტომ, რომ აქამდე იმის იმედი ჰქონდათ, რომ რესტორნებში არ დაინფიცირდებოდნენ. იმის შემდეგ, რაც აუცრელებს და ანტივაქსერებს რესტორნებში შესვლის უფლება დაუბრუნდათ, ეს უკვე პრობლემაა. ამიტომაც, ეს ძალიან ცუდი და საზიანო გადაწყვეტილებაა“ - განაცხადა ერთ-ერთი მსხვილი რესტორნის მეპატრონემ.

მისი აზრით, ამ გზით ხელისუფლება ანტივაქსერების გულის მოგებას ცდილობს, და არ ფიქრობს იმაზე, თუ რას გამოიწვევს ამ რეგულაციის მოხსნა მაღალი დაინფიცირების და ვაქცინაციის დაბალი მაჩვენებლის პირობებში.

„შესაძლოა ეს არ შეეხოს სახინკლეებს, სადაც უსახლკაროები დადიან, მაგრამ ყველა სერიოზული რესტორანი დაზარალდება. უკვე დღეს ორმა მუდმივმა კლიენტმა შეკვეთა გააუქმა, იმის შემდეგ, რაც მწვანე პასპორტები გაუქმდა“ - განაცხადა რესტორატორმა.