Tbilisi (GBC) - 2021 წელს, საქართველოს ტერიტორიაზე 15 წლის და უფროსი ასაკის ადგილობრივი ვიზიტორების საშუალო თვიური რაოდენობა 1.25 მლნ განისაზღვრა, რომელთა მიერ ქვეყნის ტერიტორიაზე განხორციელებული ვიზიტების საშუალო თვიურმა რაოდენობამ 1.4მლნ ერთეული შეადგინა. აღნიშნულ პერიოდში ვიზიტორების საშუალო თვიური რაოდენობა 36.7 %-ით მეტია 2020 წლის შესაბამის მონაცემზე.

2021 წელს საქართველოს რეზიდენტი ვიზიტორების მიერ საქართველოს ტერიტორიაზე განხორციელებული ტურისტული ტიპის ვიზიტების საშუალო თვიური რაოდენობა 662.6 ათასით განისაზღვრა, რაც 37.9 %-ით მეტია წინა წლის მაჩვენებელზე.

გამოკვლევის შედეგების მიხედვით, ვიზიტორების 43.9% ქ. თბილისის მაცხოვრებელია, 11.5 % მოდის ქვემო ქართლის რეგიონზე, 11.3 % - იმერეთის, რაჭა-ლეჩხუმისა და ქვემო სვანეთის რეგიონზე, ხოლო დანარჩენი რეგიონები სტრუქტურაში შედარებით დაბალი წილით არის წარმოდგენილი.

საანგარიშო პეროდში ყველაზე მეტი ვიზიტი განხორციელდა ქ. თბილისში (საშუალოდ 300.1 ათასი ვიზიტი თვეში) და იმერეთის რეგიონში (საშუალოდ 241.9 ათასი ვიზიტი თვეში).

2021 წელს განხორციელებული ვიზიტებისას გაწეული საშუალო თვიური ხარჯების მოცულობა განისაზღვრა 226.0 მილიონი ლარით. აღნიშნული მაჩვენებელი 53.6%-ით მეტია გასული წლის შესაბამის მაჩვენებელზე. ამასთან, ვიზიტზე გაწეული საშუალო ხარჯი გაზრდილია 13.1 %-ით და 160.1 ლარს უტოლდება.