თბილისი (GBC) –  რუსეთს და უკრაინას შორის მოლაპარაკებებში რუსული დელეგაციის ხელმძღვანელი ვლადიმირ მედინსკის თქმით, ამ ეტაპზე უკრაინის ნეიტრალური სტატუსი განიხილება. „კიევი სთავაზობს რუსულ მხარეს შვედეთის ან ავსტრიის მსგავსი, ნეიტრალური, დემილიტარიზებული ქვეყნის სტატუსს. ეს ვარიანტი ნიშნავს, რომ უკრაინა არანაირ სამხედრო ალიანსებში არ შევა, თუმცა, მას ეყოლება სრულფასოვანი ჯარი და ფლოტი“ - განაცხადა მედინსკიმ.

თუმცა, მისი თქმით, მოსკოვისთვის მთავარი თემაა ყირიმის და დონბასის სტატუსი, და ასევე რუსული ენის სტატუსი და „დენაციფიკაციის საკითხი“.

რუსული დელეგაციის ხელმძღვანელმა განაცხადა, რომ „მოლაპარაკებები კიევთან ძალიან ნელა და მძიმედ მიმდინარეობს“.

„თუმცა, ჩვენი მთავარი მიზანია მშვიდობის უსწრაფესი დამყარება“ - განაცხადა მედინსკიმ.