2021 წელს ელექტრონული და კონსოლიდირებული ტენდერების საშუალებით დადებული სახელმწიფო შესყიდვების ხელშეკრულებების მთლიანმა ღირებულებამ 4,701,769,413 ლარი შეადგინა, რაც სახელმწიფო შესყიდვების საერთო მოცულობის 82%-ია, ხოლო გამარტივებული შესყიდვების საფუძველზე გაფორმებული ხელშეკრულებების ჯამურმა ღირებულებამ მთლიანი შესყიდვების 18% - 1,052,419,113 ლარი შეადგინა. გამარტივებული შესყიდვების უმეტესი წილი - 62% (653,658,051 ლარი) განეკუთვნება ახალი კორონავირუსის პანდემიის მართვისთვის საჭირო, კრიტიკული მნიშვნელობის მქონე სამედიცინო საქონლისა და ჯანდაცვის სფეროს მომსახურებების შესყიდვებს, ასევე სასოფლო-სამეურნეო დანიშნულების სუბსიდიებს და მონეტარული ზღვრის დაცვით განხორციელებულ, 5,000 ლარზე ნაკლები ღირებულების მქონე შესყიდვებს. 

2021 წელს 31 800-მდე ღია ელექტრონული ტენდერი გამოცხადდა, რაც 24%-ით აღემატება წინა წლის მაჩვენებელს. შესყიდვების სააგენტოს წლიური ანგარიშის მიხედვით, გაზრდილია იმ ტენდერების რაოდენობა რომლებსაც საანგარიშო პერიოდის განმავლობაში მიენიჭა საბოლოო სტატუსი. ასეთი ტენდერების რაოდენობამ 29,5002 შეადგინა, რაც დაახლოებით 18%-ით აღემატება 2020 წლის მაჩვენებელს.