თბილისი (GBC) - 2021 წლის განმავლობაში განხორციელებული სახელმწიფო შესყიდვების ჯამური ღირებულება 5,754,188,526 ლარს გაუტოლდა, რაც ქვეყნის მთლიანი შიდა პროდუქტის დაახლოებით 10%-ს შეადგენს. ეს თანხა კი ბოლო 10 წლის განმავლობაში რეკორდული მაჩვენებელია. 

ელექტრონული და კონსოლიდირებული ტენდერების საშუალებით დადებული სახელმწიფო შესყიდვების ხელშეკრულებების მთლიანმა ღირებულებამ 4,701,769,413 ლარი შეადგინა, რაც სახელმწიფო შესყიდვების საერთო მოცულობის 82% არის. გამარტივებული შესყიდვების საფუძველზე გაფორმებული ხელშეკრულებების ჯამურმა ღირებულებამ მთლიანი შესყიდვების 18% - 1,052,419,113 ლარი შეადგინა. აქვე ხაზგასასმელია, რომ აღნიშნული გამარტივებული შესყიდვების უმეტესი წილი - 62% (653,658,051 ლარი) განეკუთვნება პანდემიის მართვისთვის საჭირო, კრიტიკული მნიშვნელობის მქონე სამედიცინო საქონლისა და ჯანდაცვის სფეროს მომსახურებების შესყიდვებს, ასევე სასოფლო-სამეურნეო დანიშნულების სუბსიდიებს და მონეტარული ზღვრის დაცვით განხორციელებულ, 5,000 ლარზე ნაკლები ღირებულების მქონე შესყიდვებს.