თბილისი (GBC) - საერთაშორისო სარეიტინგო სააგენტომ Moody’s ბელარუსი ევროობლიგაციების კუპონების ბელარუსულ რუბლებში დაფარვის გამო დეფოლტად გამოაცხადა, წერს Forbes.

Moody’s–ის ანგარიშში ნათქვამია, რომ ბელარუსის ფინანსთა სამინისტრომ კუპონების გადახდა ბელარუსულ რუბლებში განახორციელა და ბონდების მფლობელებმა ვერ შეძლეს ფულის მიღება. რესპუბლიკას $22,9 მლნ უნდა გადაეხადა, თუმცა საშეღავათო პერიოდის დასასრულისთვის ვალდებულების არდაფარვა Moody’s–მა დეფოლტად შეაფასა.

მანამდე, ივნისში რუსეთმა განაცხადა, რომ საგარეო ვალდებულებების დაფარვას რუბლში განახორციელებდა. რუსეთის ფინანსთა სამინისტრომ ვალდებულებების რუბლში დაფარვა 23 ივნისს განახორციელა. 27 ივნისს კი Bloomberg წერდა, რომ რუსეთმა საგარეო ვალდებულებებში დეფოლტი 1918 წლის შემდეგ პირველად დაუშვა.