თბილისი (GBC) - უკრაინული საწარმოების ხელმძღვანელები მომდევნო 12 თვის განმავლობაში სამომხმარებლო ფასების 21,7%–იან ზრდას ელიან. ინფლაციური განწყობები ომში გახვეულ ქვეყანაში ორნახევარჯერ გაუარესდა – პირველ კვარტალში ფასების ზრდას 8,7%–ით ელოდნენ.

ამის შესახებ RBC Ukraine უკრაინის საწარმოების საქმიანი მოლოდინების ანგარიშზე დაყრდნობით წერს, რომელიც ქვეყნის ეროვნულმა ბანკმა II კვარტლის პერიოდში მოამზადა.

რესპონდენტების წილი, რომლებიც 20%–ზე მაღალ ინფლაციას ელიან მომდევნო 12 თვეში, გამოკითხულთა 58,2%–ს შეადგენს.

სამომხმარებლო ფასების ზრდის მთავარ ფაქტორად საომარ მოქმედებებს გამოკითხულთა 93,2% ასახელებს. ფასების ზრდაზე ასევე დიდ გავლენას ახდენს საწარმოო ხარჯები და გაცვლითი კურსი (58,8% და 58,6% შესაბამისად). ფასების ზრდაზე ყველაზე ნაკლებად ბიუჯეტის სოციალური ხარჯები აისახება (4,9%).

აღნიშნული გამოკითხვა უკრაინის ეროვნულმა ბანკმა მაისში ჩაატარა და მასში მონაწილეობა 592–მა საწარმომ მიიღო ქვეყნის 21 რეგიონიდან.