თბილისი (GBC) - 30 და 31 ივნისს, დედაენის ბაღში, 16:00-დან 21:00 საათმდე, ევროკავშირისა და გაეროს სურსათისა და სოფლის მეურნეობის ორგანიზაციის (FAO) მხარდაჭერით, ორდღიანი აგრარული ბაზარი, სახელწოდებით - „უნიკალური ქართული გემო" - გაიმართება. მონაწილეობას მიიღებს საქართველოს სხვადასხვა კუთხიდან ჩამოსული 40-ზე მეტი მეწარმე და ფერმერი.

ყველი, თაფლი, მურაბები, საწებლები, ფქვილი და ხორცპროდუქტები - ეს მცირე ჩამონათვალია იმ პროდუქტების, რომლებიც ღონისძიებაზე იქნება წარმოდგენილი. თბილისურ ბაზარზე მოსული დამთვალიერებელი აღმოაჩენს ნიშურ აგროპროდუქტებს, რომელთა უნიკალურ გემოვნურ თვისებებს მათი ადგილწარმოშობა - ისტორიული, კულტურული თუ ტერიტორიული მახასიათებლები განსაზღვრავს.

ღონისძიების მონაწილე ფერმერები FAO-ს, ევროკავშირის და შვეიცარიის განვითარებისა და თანამშრომლობის სააგენტოს (SDC) სოფლის მეურნეობის განვითარების პროექტების ბენეფიციარები არიან. პროექტების ფარგლებში ფერმერთა დახმარება ხორციელდება როგორც აგროგანათლების, ისე საგრანტო თანადაფინანსების კუთხით.

ღონისძიებას დაესწრებიან FAO-ს, ევროკავშირის, გარემოს დაცვისა და სოფლიეს მეურნეობის სამინისტროს, პარტნიორი საერთაშორისო და ადგილობრივი ორგანიზაციების წარმომადგენელები.

აგრობაზრობა იმართება გაეროს სურსათისა და სოფლის მეურნეობის ორგანიზაციის (FAO) და ევროკავშირის მხარდაჭერით, EU4Business ინიციატივის ფარგლებში, რომლის სახელწოდებაა „ევროკავშირის ინოვაციური პროექტი საქართველოში კერძო სექტორის კონკურენტუნარიანობისთვის".