თბილისი (GBC) - უკრაინის პრეზიდენტი ვოლოდიმირ ზელენსკი ოდესის ოლქში ჩავიდა, სადაც უკრაინული ხორბლის ექსპორტის განახლების სამზადისი მიმდინარეობს. ამის შესახებ უკრაინის სახელმწიფოს მეთაურმა სოციალურ ქსელში პარასკევს დაწერა.

„ჩვენ მზად ვართ უკრაინული ხორბლის ექსპორტისთვის. ტრანსპორტირების დასაწყებად ჩვენი პარტნიორების მხრიდან სიგნალს ველოდებით“, – განაცხადა ზელენსკიმ და დასძინა, რომ უკრაინისთვის ძალიან მნიშვნელოვანია დარჩეს მსოფლიო სასურსათო უსაფრთხოების გარანტად.

ჩერნომორსკის პორტში ზელენსკი G7–ის ქვეყნების ელჩებს შეხვდა, რომლებიც უკვე ჩავიდნენ ოდესაში, საიდანაც დღესვე შეიძლება დაიძრას ხორბლით დატვირთული ხომალდები.

უკრაინის პრეზიდენტმა თქვა, რომ პირველი გემი, რომელიც ხორბლით იტვირთება, თურქეთს ეკუთვნის.