თბილისი (GBC) - მაის-ივნისის მონაცემებით, საქართველოდან $6.3 მლნ-ის 12.4 მლნ ლიტრი მინერალური და გაზიანი წყლებია ექსპორტირებული, რაც ფულად გამოსახულებაში 75.5%-ით ნაკლებია წინა წლის იმავე პერიოდის ანალოგიურ მაჩვენებელზე (2021 მაის-ივნისი: $24.5 მლნ-ის 45 მლნ ლ).

საანგარიშო პერიოდში,მინერალური წყლები ყველაზე დიდი რაოდენობით რუსეთში გავიდა. რუსეთში მაის-ივნისში $2.5 მლნ-ის 4.9 მლნ ლიტრი მინერალური წყლები ექსპორტირდა, რაც ექსპორტის 41%-ია. თუმცა წინა წლის იმავე პერიოდთან შედარებით  კლება 77%-ია (2021 მაის-ივნისი: $11 მლნ-ს 19.2 მლნ ლ).

მეორე ადგილზეა უკრაინა $0.7 მლნ-ის 1.4 მლნ ლ. როგორც რუსეთში, ასევე უკრაინაში ექსპორტის დიდი კლებაა. საანგარიშო პერიოდში 81.2%-იანი კლება დაფიქსირდა (2021მაის-ივნის: $3.3 მლნ-ს 8.2 მლნ ლ).

მესამე ადგილზეა ლიეტუვა, სადაც ასევე $0.6 მლნ-ს 1.3 მლნ ლ გავიდა. ლიეტუვას წლიდან წლამდე 83.4% კლება აქვს (2021 მაის-ივნისი: $3.7 მლნ-ის 5.6 მლნ ლ).

მინერალური წყლების ექსპორტის ასეთი კლება, შესაძლოა უკავშირდებოდეს აპრილში ბორჯომის ქარხნის გაჩერებას.

მას შემდეგ რაც საქართველოს მთავრობამ ივნისში ბორჯომის აქციების 7.7% უსასყიდლოდ მიიღო, IDS ბორჯომმა განაახლა მუშაობა. მანამდე კი კომპანიის აქციების საკონტროლო პაკეტს სანქცირებული რუსი ოლიგარქი მიხაილ ფრიდმანი ფლობდა.