თბილისი (GBC) – სებ–ის სტატისტიკური მონაცემების თანახმად, საერთაშორისო მოგზაურებიდან მიღებულმა შემოსავალმა ივლისში $476,1 მლნ შეადგინა, რაც $80,7 მლნ–ით აჭარბებს პანდემიამდელი 2019 წლის ივლისის ანალოგიურ მაჩვენებელს ($395,4 მლნ). გასული 2021 წლის ივლისის მაჩვენებელს ($205.3 მლნ) ვიზიტორებიდან მიღებულმა შემოსავლებმა წელს 2,3–ჯერ გადააჭარბა.

სებ–ის მონაცემებით, საანალიზო პერიოდში ევროკავშირის ქვეყნებიდან შემოსულმა ვიზიტორებმა საქართველოში $43,6 მლნ დახარჯეს, რაც $18,8 მლნ–ით ნაკლებია პანდემიამდელი 2019 წლის ანალოგიური პერიოდის მაჩვენებელთან შედარებით ($62,4 მლნ).

დანარჩენი ქვეყნებიდან შემოსული ვიზიტორების ხარჯებმა ივლისში $87,6 მლნ შეადგინა, რაც $24,7 მლნ–ით მეტია 2019 წლის ივლისის მაჩვენებელზე ($62.9 მლნ).

საქსტატის მონაცემებით, II კვარტალში საქართველოს ტერიტორიაზე დაფიქსირდა საერთაშორისო არარეზიდენტი მოგზაურების 1 მლნ შემოსვლა, რაც 198.7%-ით მეტია წინა წლის ანალოგიური პერიოდის მაჩვენებელზე. შემოსვლების უდიდესი ნაწილი, 47.0 %, განხორციელდა 31-50 წლის მოგზაურების მიერ.

2022 წლის II კვარტალში ვიზიტორების ყველაზე დიდი რაოდენობა, 147.7 ათასი, დაფიქსირდა რუსეთის ფედერაციიდან, რაც ვიზიტორების ჯამური რაოდენობის 19.3%-ს შეადგენს. მეორე ადგილზეა თურქეთი 14.9%-იანი წილით, ხოლო მესამეზე - სომხეთი 12.1%-იანი წილით. შესაბამისად, ვიზიტების ყველაზე დიდი რაოდენობა განხორციელდა რუსეთის ფედერაციის (175.4 ათასი), თურქეთის (158.3 ათასი) და სომხეთის (136.8 ათასი) მოქალაქეების მიერ.