თბილისი (GBC) - 2022 წლის იანვარ-ივლისში საქართველოში საქონლით საგარეო სავაჭრო ბრუნვამ $10.2 მლრდ შეადგინა, რაც წინა წლის შესაბამის პერიოდთან შედარებით 35.3%-ით მეტია. აქედან ექსპორტი $3.1 მლრდ შეადგენს (36.4%-ით გაიზარდა), ხოლო იმპორტი $7.1 მლრდ (34.8%-ით მეტია). საქართველოს უარყოფითმა სავაჭრო ბალანსმა, 2022 წლის იანვარივლისში, $4 მლრდ შეადგინა, რაც საგარეო სავაჭრო ბრუნვის 39.1%-ია. საქართველოს საგარეო ვაჭრობაში ჩამოყალიბებულ ზოგად ტენდენციებს ასახავს გრაფიკული გამოსახულება, 2017-2022 წლების დინამიკური მწკრივის მიხედვით:

ქვემოთ მოცემული დიაგრამა გვიჩვენებს ქვეყნების ჯგუფების წილს საქართველოს მთლიან ექსპორტსა და იმპორტში:

 2022 წლის იანვარ-ივლისში ათი უმსხვილესი საექსპორტო ქვეყნის წილმა საქართველოს მთლიან ექსპორტში 79.6% შეადგინა. უმსხვილესი საექსპორტო სამეული შემდეგნაირად ჩამოყალიბდა: ჩინეთი ($475.6 მლნ.), აზერბაიჯანი ($351.5 მლნ.) და რუსეთი ($339.1 მლნ).

 ამ პერიოდში  ათი უმსხვილესი საიმპორტო პარტნიორი ქვეყნის წილმა საქართველოს მთლიან იმპორტში 66.4% შეადგინა. პირველ სამეულში შედის: თურქეთი ($1.2მლრდ) რუსეთი ($874.9 მლნ.) და ჩინეთი ($619.0 მლნ.).

 იანვარ-ივლისში ათი უმსხვილესი სავაჭრო პარტნიორი ქვეყნის წილმა საქართველოს მთლიან საგარეო სავაჭრო ბრუნვაში 68.8 % შეადგინა. ქვეყნის უმსხვილესი სავაჭრო პარტნიორები არიან: თურქეთი ($1.5მლრდ), რუსეთი ($1.2მლრდ) და ჩინეთი ($1.1 მლრდ).

 სასაქონლო ჯგუფებიდან საექსპორტო ათეულში პირველი ადგილი სპილენძის მადნებმა და კონცენტრატებმა დაიკავა $621.0 მლნ, რაც მთელი ექსპორტის 20%-ს შეადგენს. მეორე ადგილს იკავებს მსუბუქი ავტომობილები $370.8 მლნ. (მთლიანი ექსპორტის 12.0%), ხოლო მესამე ადგილზეა ფეროშენადნობები $354.3 მლნ. (11.4%).

 უმსხვილესი საიმპორტო სასაქონლო ჯგუფი 2022 წლის იანვარ-ივლისში წარმოდგენილი იყო მსუბუქი ავტომობილების სახით, რომლის იმპორტმა $759.7 მლნ. და მთელი იმპორტის 10.7 % შეადგინა. მეორე ადგილს იკავებდა ნავთობი და ნავთობპროდუქტები $718.8 მლნ. (იმპორტის 10.1%), ხოლო მესამე ადგილზეა სპილენძის მადნები და კონცენტრატები $490.9 მლნ. (იმპორტის 6.9%).