თბილისი (GBC) – ფულადი გზავნილების მაღალ ნიშნულზე ხანგრძლივი ვადით შენარჩუნებას საქართველოს ეროვნული ბანკის (სებ) ვიცე–პრეზიდენტი არ ელოდება. პაპუნა ლეჟავამ ფინანსური სტაბილურობის კომიტეტის ოთხშაბათის სხდომის შემდეგ განაცხადა, რომ ამ მიმართულებითაც არასტაბილურობაა, დინამიკა შეიძლება 1 წლით ან ცოტა ხანგრძლივი პერიოდით შენარჩუნდეს.

„სწორედ ამ ფაქტორის გამო არის ტურისტული სტატისტიკა დამახინჯებული. მოსალოდნელი სტრესული პერიოდის გათვალისწინებით, სებ–ი პირველად დააწესებს ყველა ბანკისთვის კონტრციკლურ ბუფერს. ეს მაჩვენებელი ჯერჯერობით 0%–ზე ნარჩუნდება, თუმცა ზრდა განიხილება“, – თქვა ლეჟავამ.

ამასთან, მისივე თქმით, სარეზერვო მოთხოვნის გაზრდაც რჩება დღის წესრიგში, თუმცა ეს ინსტრუმენტი საჭიროების მიხედვით იქნება გამოყენებული.

პაპუნა ლეჟავას თქმით, რუსეთ–უკრაინის ომს საქართველოზე მატერიალური გავლენა ჯერ არ ჰქონია და პირიქით – ფულადი შემოდინებები გაიზარდა, რასაც გარკვეული წვლილი მიუძღვის ეკონომიკის ორნიშნა ზრდაში. ეკონომიკის ასეთი ზრდის ფაქტორად ლეჟავამ  ასევე დაასახელა პანდემიის შეზღუდვების მოხსნის და საბანკო კონტრიბუციის ეფექტი. მისივე თქმით, ეკონომიკის ორნიშნა ზრდის შენარჩუნება რთული იქნება.