თბილისი (GBC) - ზამთრის საკურორტო ზონაში თანამედროვე ვერტმფრენით ტურისტული ჯგუფების მომსახურებას კიდევ ერთი კომპანია განახორციელებს.

გერმანულმა HTM Helicopter Travel Munich GmbH-მა  სამოქალაქო ავიაციის სააგენტოსგან ფრენების განხორციელების ნებართვა მიიღო. ნებართვის მინიჭების თაობაზე შუამდგომლობით სააგენტოს შპს „ჰელიქსირმა“ მიმართა.

ფრენები 4 თებერვლიდან 31 მარტამდე განახორციელდება. HTM Helicopter Travel Munich GmbH-ის კუთვნილი, AS 350 B3 ტიპის თანამედროვე ვერტმფრენით, ქართული კომპანია „ჰელიქსირი“ განახორციელებს გუდაურის საკურორტო ზონაში მცირე ტურისტული ჯგუფების მომსახურებას, კერძოდ, Heli-skiing ტურებს, რაც ვერტმფრენებით მოთხილამურეების და სნოუბორდისტების გაუკვალავ თოვლში გადასხმას, თხილამურებით სრიალისა და სნოუბორდინგის ორგანიზებას გულისხმობს.

შეგახსენებთ, ზამთრის ტურისტულ ზონებში ფრენების უფლება ავსტრიულმა კომპანია Wucher Helikopter Gmbh-მაც მოიპოვა.