თბილისი (GBC) – “ყაზტრანსგაზი”  საქართველოში დარჩენას და  საინვესტიციო აქტივობის განახლებას  ვალის ხარჯში ჩაბრუნებით ელის, რასაც საქართველოს მთავრობა არ იწონებს.  

ენერგეტიკის მინისტრის მოადგილე მარიამ ვალიშვილი ადასტურებს, რომ  ქართული მხარე მიესალმება „ყაზტრანსგაზ თბილისში“ ყაზახური მენეჯმენტი დაბრუნებას, თუმცა გარკვეული პირობებით.

მთავრობა მომხმარებელთა სტაბილურ და ხარისხიან მომსახურებაზე აკეთებს აქცენტს და ინვესტორისგან განვითარების სრულყოფილ გეგმას  ითხოვს.

კომპანიას საქართველოს მიმართ რამდენიმე ათეული მილიონი მართებს,  „დაკარგული ფულის“ ინვესტიციაში გატარების ალბათობას კი, მთავრობა გამორიცხავს. 

შეგახსენებთ,  „ყაზტრანსგაზის“ თემა იმ საკითხთა შორისაა, რაზეც საქართველო -ყაზახეთის ეკონომიკური კომისიის სხდომაზე იმსჯელებენ. 

ამის შესახებ ეკონომიკის მინისტრმა დიმიტრი ქუმსიშვილმა განაცხადა და აღნიშნა, რომ სხდომა 9 და 10 ივნისს ყაზახეთშია დაგეგმილი.