თბილისი (GBC) -  ჩინეთში ქართული ღვინის პოპულარიზაცია სამთავრობო დონზე მოხდება.

„შინჰუა ნეტის“ და Silk Road Chamber of International Commerce-ის პარტნიორობით იხსნება ონლაინ-პლატფორმა E-SilkRoad, სადაც  ქართული ღვინო ონლაინ რეჟიმში გაიყიდება. 

მემორანდუმის ხელმოწერამდე, დიმიტრი ქუმსიშვილი Silk Road Chamber of International Commerce–ის გენერალურ მდივანს, ლი ჭონგ ჯანგს შეხვდა. 

„ახალ აბრეშუმის გზაზე საქართველო წარმოდგენილი იქნება, როგორც ღვინის მწარმოებელი და მიმწოდებელი ქვეყანა. როდესაც ამ პლატფორმას ქმნიდა აბრეშუმის გზის საერთაშორისო სავაჭრო პალატა, მათ საპილოტე რეჟიმში შეიძინეს 5000  ბოთლი ქართული ღვინო, რომელიც ერთ ღამეში გაყიდეს. დღეს უკვე  მათ შეკვეთილი აქვთ 300 000  ბოთლი ქართული ღვინო და დაგეგმილია, რომ ეს რაოდენობა დაახლოებით 1 მილიონ ბოთლამდე  გაიზარდოს.  შესაბამისად, საქართველოს წარმოჩენა ახალ აბრეშუმის გზაზე, როგორც ღვინის მწარმოებელი და მიმწოდებელი ქვეყნის, ჩვენთვის ძალიან მნიშვნელოვანია“ - განაცხადა დიმიტრი ქუმსიშვილმა.

ქუმსიშვილმა  აღნიშნა, საქართველო მსოფლიოში არის ერთადერთი ქვეყანა, რომელიც ბოლო 8 000 წლის განმავლობაში განუწყვეტლივ აწარმოებს ღვინოს.

„ საქართველოში შეიძლება  ძალიან ბევრს ვერ ვაწარმოებთ, მაგრამ ჩვენი ღვინო  არის საუკეთესო ხარისხის და ამას ადასტურებს ჩინურ ბაზარზე მზარდი მოთხოვნაც. შესაბამისად,  მეტი შესაძლებლობა გვექნება, რომ მთელი აბრეშუმის გზის გასწვრივ მოვახდინოთ ჩვენი ღვინისა და კულტურის პოპულარიზაცია“ - აღნიშნა დიმიტრი ქუმსიშვილმა.

აღსანიშნავია, რომ ჩინეთში ქართულ ღვინოზე მოთხოვნა მზარდია. წლის პირველ ნახევარში ჩინეთი  1 884 665 ბოთლი ღვინოა ექსპორტირებული, ზრდა 148%-ია. ამ მაჩვენებლით ჩინეთი საექსპორტო ბაზრების TOP-5-ში მესამე ადგილზეა.