თბილისი (GBC) - ნატო-საქართველოს წვრთნისა და შეფასების ერთობლივი ცენტრი (JTEC) პირველად, სამეთაურო-საშტაბო სწავლებას მასპინძლობს, რომელსაც ქართველი ოფიცრები უძღვებიან ( კრიზისის საპასუხო ოპერაციის დაგეგმვა, კოორდინირება და აღსრულებისთვის საჭირო უნარ-ჩვევები).

პრემიერის გიორგი კვირიკაშვილის შეფასებით, უპრეცედენტოა ფაქტია, რომ ასეთი დონის სწავლებას ნატოს პარტნიორი არაწევრი  ქვეყანა - საქართველო ატარებს. ეს ფორმატი ქართველ სამხედროებს  აძლევს უნიკალურ შესაძლებლობას, მოკავშირეებისა და პარტნიორი ქვეყნების შეიარაღებული ძალების წარმომადგენლებთან ერთად, ნატოს პროცედურების შესაბამისად, განავითარონ პროფესიული უნარები.

ერთობლივი სწავლება, რომელიც ნატო-საქართველოს არსებითი პაკეტის ფარგლებში (SNGP) ტარდება, 20 ნოემბრამდე გაგრძელდება.

ჩართულია 11 მოკავშირე და 2 პარტნიორი ქვეყანა, მათ შორის - თურქეთი, ლატვია, ლიტვა, ნიდერლანდების სამეფო, რუმინეთი, უნგრეთი, ბულგარეთი, ბელგიის სამეფო, სლოვენია, დიდი ბრიტანეთისა და ჩრდილოეთ ირლანდიის გაერთიანებული სამეფო, ამერიკის შეერთებული შტატები და პარტნიორი ქვეყნები - უკრაინა და მაკედონია.