თბილისი (GBC) - საქართველოს, მომავალ წელს, ამერიკის შეერთებული შტატებიდან, მცირე და საშუალო მეწარმეების ჯგუფი ეწვევა, - ამის შესახებ საქართველოს პრემიერ-მინისტრის მოვალეობის შემსრულებლის, გიორგი კვირიკაშვილისა და ამერიკული საინვესტიციო კომპანია Schulze Global Investments-ის დამფუძნებლისა და გენერალური დირექტორის, გაბრიელ შულცის შეხვედრისას აღინიშნა.

Schulze Global Investments-ი, რომელიც მსოფლიოს უდიდეს ბაზრებზე, ასობით მილიონი დოლარის ოდენობის ინვესტიციას მართავს, საქართველოში მცირე და საშუალო ჰესების მშენებლობაში ინვესტირებით არის დაინტერესებული.

შეხვედრისას საუბარი საქართველოს საინვესტიციო შესაძლებლობებს შეეხო. Schulze Global Investments-ის დამფუძნებლის შეფასებით, საქართველო ინვესტორებისთვის ძალიან საინტერესო ბაზარია და მას საკმაოდ დიდი პოტენციალი აქვს.

აღსანიშნავია, რომ საქართველოში, Schulze Global Investments-ი 100 მილიონ აშშ დოლარიან Caucasus Clean Energy Fund-ს მართავს, რომელიც ფოკუსირებულია მცირე და საშუალო ჰიდროელექტროსადგურების მშენებლობაში ინვესტირებაზე.