თბილისი (GBC) - ეკონომიკის მინისტრი მიიჩნევს, რომ გრძელვადიან პერიოდში ლარის გაუფასურების სერიოზული მიზეზი არ არსებობს.

გიორგი გახარიამ აღნიშნა, რომ გაცვლითი კურსის რყევა მოკლევადიანია და  მაშინ, "როდესაც ხდება მოლოდინების გამძაფრება, ხდება გადამეტებული რეაგირება ლარის კურსზე“.

"გრძალვადიან პერსპექტივაში ჩვენ დარმწუნებული ვართ, რომ ლარის კურსი გამყარდება, თუმცა კიდევ ერთხელ მინდა აღვნიშნო, რომ ამისთვის გასაკეთებელია ბევრი რამ. პირველ რიგში, ეს გახლავთ სწრაფი ეკონომიკური ზრდა, რომლის განსახორციელებლად შექმნილია 4-პუნქტიანი გეგმა“, - განაცხადა გახარიამ.

მინისტრმა ეკონომიკის სტრუქტურული პრობლემების გასწორების მექანიზმიც დაასახელა- სწრაფი ეკონომიკური ზრდა, პირდაპირი უცხოური ინვესტიციების მოზიდვა, ადგილობრივი წარმოების მხარდაჭერა.