თბილისი (GBC) -  პარლამენტის ნაციონალური ფრთა  გაზპრომის განახლებულ ხელშეკრულებაზე უმაღლეს საკანონმდებლო ორგანოს რეზოლუციით მიმართავს,  პროცედურა 19 იანვრის ბრიფინგზე გახდება ცნობილი.

„მთავრობა პრეზიდენტსაც კი უმალავს გაზპრომთან გაფორმებული ხელშეკრულების შინაარსს. არ ამბობენ, თუ რამდენს გადაგვიხდიან ტრანზიტში და რა რაოდენობის გაზი მოგვივა ამ თანხაში.  ჩვენი ინფორმაციით 2018 წლიდან წელიწადში ვკარგავთ 20 მილიონ დოლარს. გარდა ამისა, იკარგება გაზპრომზე ზემოქმედების ბერკეტები.  მთავრობამ მკაცრად უნდა აგოს პასუხი ამ ანტისახელმწიფოებრივი ქმედებისათვის. მხოლოდ ენერგეტიკის მინისტრის გადაყენება არაა საკმარისი“, - კახი კალაძესთან ერთად, მთავრობის სხვა წევრების  პასუხისმგებლობაზე  რომან გოცირიძე Facebook-ში წერს.

ენერგეტიკის მინისტრმა, ვიცე-პრემიერმა ოთხშაბათის ბრიფინგზე განაცხადა, რომ  „გაზპრომთან“ შეთანხმების შესახებ სრული ინფორმაცია გავრცელდა მედიით, შედგა კომუნიკაცია პრეზიდენტის ადმინისტრაციასთან, შეხვედრები ექსპერტებთან და არასამთავრობოებთან გაიმართა. 

განაცხადა, რომ „ ამ მოლაპარაკებებით ჩვენ შევინარჩუნეთ ენერგოდამოუკიდებლობის იგივე ხარისხი, ქვეყნის სატრანზიტო ფუნქცია რეგიონში და სტაბილური განვითარება, შეიცვალა მხოლოდ გადახდის ფორმა“.