თბილისი (GBC) - შემოსავლების სამსახური არადეკლარირებული სიგარეტის ქვეყანაში უკანონოდ შემოტანის ფაქტების აღკვეთაზე აცხადებს.

უწყების ცნობით,  22 იანვარს,  საბაჟო გამშვებ პუნქტში „სადახლო-საავტომობილო“ დიდი ოდენობით,  22 340 ღერი არადეკლარირებული სიგარეტი  საქართველოში სომხეთის მოქალაქეს, გ.ს-ს  კუთვნილ ავტომანქანაში  სპეციალურ სამალავებში აღმოაჩინეს. 

ამავე დღეს, ასევე დიდი ოდენობით არადეკლარირებული სიგარეტი - 18 600 ღერი, მებაჟე ოფიცრებმა საბაჟო გამშვებ პუნქტში „ნინოწმინდა“ ამოიღეს.  საქონელი სომხეთის რესპუბლიკის მოქალაქის, კ.მ-ს კუთვნილ ავტომობილში მოწყობილ სამალავებში ჰქონდა განთავსებული.

უფრო ადრე, 14 იანვარს, შემოსავლების სამსახურის მებაჟე ოფიცრების მიერ, 1,760 ღერი არადეკლარირებული სიგარეტი იქნა აღმოჩენილი საბაჟო გამშვებ პუნქტში „სადახლო-საავტომობილო“.

სომხეთიდან სიგარეტის კონტრაბანდის ფაქტების გახშირებას თამბაქოს ინდუსტრია პროგნოზირებდა. მიზეზი ქვეყნებს შორის თამბაქოს პროდუქციაზე ფასების სხვაობაა, რაც იანვრიდან  საქართველოში აქციზის მკვეთრმა ზრდამ კიდევ უფრო გააღრმავა.