თბილისი (GBC) - 2017 წელს, საბავშვო ევროვიზიის რიგით მე-15 კონკურსის საქართველოში ჩატარდებას მნიშვნელოვან ფაქტს უწოდებს ეკონომიკის მინისტრის მოადგილე.

ქეთევან ბოჭორიშვილი ამბობს, რომ კონკურსის ტრანსლირება   თითქმის 50 სხვადასხვა ქვეყანაში ხდება, რაც ძალიან პოზიტიურ ჭრილში  ხელს შეუწყობს ქვეყნის პოპულარიზაციას და ცნობადობის ამაღლებას.

ეს თავისთავად  საერთაშორისო ვიზიტორებზე  და ტურისტების შემოდინებაზეც აისახება. მინდა აღვნიშნო, რომ ტურიზმი არის ჩვენი ერთ-ერთი პრიორიტეტული მიმართულება. ამ მხრივ 2016 წელს რეკორდული მაჩვენებელი დაფიქსირდა, რის მიხედვითაც   6.4 მლნ საერთაშორისო ვიზიტორს ვუმასპინძლეთ. ეს ნიშნავს უფრო მეტ სამუშაო ადგილს, მეტ შემოსავალს ჩვენს ოჯახებში  და უფრო მეტ ბიზნესსაქმიანობას ქვეყანაში“ - აღნიშნა ქეთევან ბოჭორიშვილმა.

ტურიზმის ეროვნული ადმინისტრაციის ხელმძღვანელი კი, დამატებით აქტივობებსაც გეგმავს, მათ შორის,  ჟურნალისტების მოწვევას იმისთვის, რომ ეს ღონისძიება  სხვადასხვა არხების  მეშვეობით გამოყენებული იქნას პოპულარიზაციისთვის. 

საბავშვო ევროვიზია 2017-ის კონკრეტული დეტალები განიხილება და დაზუსტდება საქართველოში ევროპის მაუწყებელთა კავშირის დელეგაციის ვიზიტის ფარგლებში, რომელიც მიმდინარე წლის 22-24 თებერვალს გაიმართება.

შეგახსენებთ, 2016 წელს საქართველო საბავშვო ევროვიზიის გამარჯვებული მესამედ გახდა და ევროფესტივალის გამარჯვებულ ქვეყნებს შორის რეკორდი დაამყარა, რადგან მსგავსი შედეგი ამ დრომდე არცერთ ქვეყანას ჰქონია. 2016 წლის საბავშვო ევროფესტივალის რიგით მე - 14 კონკურსზე საქართველოს წარმატება 239 ქულით მარიამ მამადაშვილმა მოუტანა.