თბილისი (GBC) -  საყოველთაო დაზღვევის ბაზების განახლებას და კერძო და სახელმწიფო დაზღვევის გამიჯვნას GPI Holding-ი უარყოფითად აფასებს.

კომპანიაში აცხადებენ, რომ ცვლილება მოქალაქეებს კერძო დაზღვევის გაუქმების სტიმულს მისცემს, რაც საბიუჯეტო დანახარჯის დაზოგვის ნაცვლად მის ზრდას გამოიწვევს.

GPI Holding-ს მარკეტინგის ხელმძღვანელი თინა სტამბოლიშვილი ამბობს, მოხდება ადამიანების გადადინება კერძო სექტორიდან სახელმწიფოს ხარჯზე დაზღვევაზე და რისი ნიშნებიც უკვე არის-   დაზღვევის გაუქმების თაობაზე კომპანიებს უკვე ურეკავენ. ამასთან,  როდესაც უკანა რიცხვით ხდება დადგენილების მიღება, ადამიანებს არ დარჩათ დრო თადარიგის დაჭერისთვის და ფაქტის წინაშე აღმოჩნდნენ.

კომპანიის მარკეტინგის ხელმძღვანელის განცხადებითვე, GPI Holding-ს მოუწევს მოქმედი კონტრაქტების გადახედვა, რაც მტკივნეული პროცესია პირველ რიგში დაზღვეულებისთვის და ამასთანავე, სადაზღვევო ბაზრის დინამიკაზე უარყოფითად აისახება, შემცირდება ჯანმრთელობის დაზღვევის ბაზარი.