თბილისი (GBC) – ბიზნესის ხელსაყრელობის ინდექსით  საქართველოს დაწინაურებაში მთავრობის როლზე  ფინანსთა მინისტრმა დიმიტრი ქუმსიშვილმა განაცხადა კონფერენციაზე „ინოვაციების როლი XXI“  საუკუნის საქართველოში, რომელიც ცენტრალური ევრაზიის ლიდერთა ალიანსის (CELA) ორგანიზებით  გაიმართა.

„რეიტინგი ასახავს, რამდენად წინ არის წასული ჩვენი სახელმწიფო ბიზნესთან ურთიერთობაში, რამდენად ნაკლებ დროსა და თანხებს ხარჯავს ბიზნესი სახელმწიფოსთან ურთიერთობაში. რა თქმა უნდა, ეს ყველაფერი შეუძლებელია სტრუქტურული რეფორმების, საჯარო სექტორში ინოვაციების დანერგვის გარეშე. ჩვენ  გვაქვს ასეთი ინოვაციური პროექტი და ესაა „ბიზნესსახლი“, რომელიც 600-მდე სერვსს აჯგუფებს“, - აღნიშნა დიმიტრი ქუმსიშვილმა.

ალიანსი 2002 წელს ამერიკელ ბიზნესმენთა ასოციაციამ (SIBF) დააარსა. ამ დროისათვის კავკასიისა და შუა აზიის 9 ქვეყნიდან (საქართველო, სომხეთი, აზერბაიჯანი, ყირგიზეთი, ყაზახეთი, უზბეკეთი, თურქმენეთი, ტაჯიკეთი და ავღანეთი) 400-მდე ლიდერს აერთიანებს .