თბილისი (GBC) - ინოვაციების სააგენტო ახალ პროექტს  Startup Beats-ს იწყებს,  რომლის მიზანია საქართველოში არსებულ სტარტაპებს შორის კომუნიკაციის დამყარება და გამოცდილების გაზიარება.

 პირველი შეხვედრა, 23 მარტს 19 საათზე ტექნოპარკში გაიმართება.

პროექტს გახსნიან პროგრამა  „სტარტაპ საქართველოს“ გამარჯვებული კომპანიების დამფუძნებლები:  ბაჩო ხაჩიძე, კომპანია  “Treepex“-ის დამფუძნებელი და  შოთა გიორგობიანი, კომპანია “OptioAI”-ის დამფუძნებელი.

აღნიშნულმა სტარტაპებმა, ასევე გამარჯვება მოიპოვეს საერთაშორისო კონკურსებზე: Mobile World Congress (ესპანეთი) და The Fincluders Startup Challenge (გერმანია).

შეხვედრაზე სპიკერები ისაუბრებენ, როგორც კონკურსებში მიღებულ გამოცდილებაზე, ისე სტარტაპის შექმნისა და განვითარების საკითხებზე.

"Treepex - ხის დარგვის ინოვაციური გადაწყვეტილებაა.  ახალი ტექნოლოგიების საშუალებით ვაკავშირებთ კომპანიებს და ინდივიდუალურ მომხმარებლებს, იმ ადგილობრივ მოსახლეობასთან, რომლებიც დაზიანებული ტყის მასივის მიმდებარედ ცხოვრობენ - მთელი მსოფლიოს მაშტაბით", - აღნიშნავს ბაჩო ხაჩიძე. 

" OptioAI არის  განსხვავებული ციფრული მობილური საფულე პირადი ფინანსების დაგეგმვისა და მართვისათვის, რომელიც ხელოვნური ინტელექტისა და ე.წ. “ჩათბოტების” საფუძველზე ასრულებს პირადი ასისტენტის როლს და ბუნებრივი ინტერაქციის წყალობით ამარტივებს ფინანსების მართვის პროცესს", - ამბობს შოთა გიორგობიანი .