თბილისი (GBC) - შავი ზღვის აუზის ქვეყნებში საქართველო ერთადერთია, სადაც საკონტეინერო გადაზიდვები შემცირდა.

„პორტნიუსის“ ინფორმაციით, 2016 წელს საქართველოს, რუსეთის, უკრაინის, ბულგარეთისა და რუმინეთის პორტებში 2 460 028  TEUs კონტეინერი გადამუშავდა, მათ შორის 1 785 618 TEUs დატვირთული იყო. წლიურმა ზრდამ რეგიონში 9.62% შეადგინა.

საქართველოში საკონტეინერო გადაზიდვები 12% შემცირდა, უკრაინაში 30,66% გაიზარდა, რუმინეთში ზრდამ  4.71% შეადგინა, რუსეთში 7,52%, ხოლო ბულგარეთში 4.65%.

დატვირთული კონტეინერების საერთო მოცულობაში 51.37% იმპორტზე მოდიოდა, 48.63%  ექსპორტზე. ყველაზე დიდი, რეკორდული ზრდა საექსპორტო ტვირთებში უკრაინასა და რუსეთში დაფიქსირდა, 29.6% და 24.01%.  

გადამუშავებული კონტეინერების 29.87% უკრაინაზე მოდიოდა, 24.99% რუმინეთზე, 24.92% რუსეთზე, 10,9% საქართველოზე და 9.29% ბულგარეთზე.

რაც შეეხება პორტების რეიტინგს, პირველ ადგილზე დარჩა კონსტანცა, მესამედან მეორეზე დაწინაურდა ოდესის ნავსადგური, მესამეზე გადაინაცვლა ფოთმა (APM Terminals), მეოთხე და მეხუთე ადგილებზე რუსული ნავსადგურებია.

საკონტეინერო ხაზებში ლიდერები არიან: Maersk Line, MSC, CMA CGM, ARKAS და ZIM.