თბილისი (GBC) - საქართველოს საჰაერო სივრცეში ფრენების რაოდენობა 15%-ით გაიზარდა.

"საქაერონავიგაციის" მონაცემებით, წლის პირველ 4 თვეში უწყება 41 914 საჰაერო ხომალდს მოემსახურა, გაიზარდა როგორც საქართველოს აეროპორტებში მომფრენი და გამფრენი, ასევე სატრანზიტო რეისების რაოდენობაც.

2017 წლის იანვარ-აპრილის განმავლობაში საქართველოს აეროპორტებში შესრულებულია 9 618 ინსტრუმენტალური ფრენა, 35%-ით მეტი ვიდრე შარშან.

ამავე პერიოდში ტრანზიტული რეისების რაოდენობამ 7%-ით, 31 426 ერთეულამდე მოიმატა.

“ბოლო წლებში მნიშვნელოვნად იზრდება უცხოური ავიაკომპანიების დაინტერესება საქართველოს საჰაერო სივრცით. ამას განაპირობებს „საქაერონავიგაციის“ მიერ ოპტიმალურად დაგეგმილი მარშრუტები, უახლესი სანავიგაციო ტექნოლოგიებით და უახლესი შუქ-ტექნიკით აღჭურვილი აეროპორტები და ევროპული დონის სერვისი, რომელსაც ჩვენ ავიაკომპანიებს ვთავაზობთ“, - აცხადებენ უწყებაში და წელსაც საერთაშორისო სტანდარტების სისტემების დანერგვის კუთხით აქტივობის შენარჩუნებას აანონსებენ.  

აღსანიშნავია, რომ საქართველოს საჰაერო სივრცეში ტრანზიტული ხომალდები 19 მარშრუტზე მოძრაობენ,  ბოლო 4 წლის განმავლობაში დაემატა 6 ახალი საჰაერო მარშრუტი.