თბილისი (GBC) - თევზის მწარმოებლებს 500 მილიონიანი ბაზარი გაეხსნათ.  

საქართველოდან შავი ზღვის თევზისა და თევზის პროდუქტებისთვის ევროკავშირის ბაზარი უკვე გაიხსნა.

“დღეისათვის, 30 მილიონ დოლარამდე ღირებულების პროდუქტის ექსპორტი ხორციელდება თურქეთში, რომელიც, ფაქტობრივად, ერთადერთი საექსპორტო ბაზარი იყო ქართული თევზისთვის. დღეიდან ქართულ პროდუქტს შესაძლებლობა ექნება 500 მილიონიან, უფრო მაღალ მსყიდველობითუნარიან ევროპულ ბაზარზე დაიმკვიდროს ადგილი. ეს იმას ნიშნავს, რომ სექტორში გაჩნდება მეტი შესაძლებლობები, რაც იქნება სტიმული საქართველოში თევზჭერის და მთლიანად ინდუსტრიის განვითარებისთვის“, - აღნიშნა სოფლის მეურნეობის მინისტრმა, ლევან დავითაშვილმა.

ლევან დავითაშვილმა აღნიშნა, შემდგომი ეტაპი ითვალისწინებს საქართველოს მხრიდან ევროკომისიისთვის აღიარებული ბიზნესოპერატორების სიის წარდგენას, რის შემდეგაც აღნიშნული ბიზნესოპერატორები შეძლებენ ევროკავშირის ქვეყნებში შავი ზღვის თევზისა და თევზის პროდუქტების ექსპორტის განხორციელებას.

მესამე ქვეყნების ოფიციალურ სიაში საქართველოს შეყვანის მიზნით, ქართულმა მხარემ ევროკომისიაში განაცხადი 2014 წელს წარადგინა, გატარებული სამუშაოების შემდეგ, შავი ზღვის ქართულ აკვადორიაში მოპოვებული თევზი მე-3 ცხოველური წამოშობის პროდუქტია (მატყლისა და თაფლის შემდეგ), რომელიც ევროკავშირის ბაზარზე შევა.

აღსანიშნავია, რომ პროტეინების მაღალი პროცენტული შემცველობის გამო ევროპელი სპეციალისტები ქართულ თევზის ფქვილს წარმატებას უწინასწარმეტყველებენ.