თბილისი (GBC) - ეროვნული ბანკის პრეზიდენტი მომხმარებელს სახსრების განთავსების რისკებთან დაკავშირებით სოციალური ქსელითაც მიმართავს.

კობა გვენეტაძე  საკუთარი facebook გვერდზე წერს, რომ კომპანიები ფიზიკური პირებისაგან მოზიდულ სახსრებს შესაძლოა  საკმაოდ რისკიან აქტივებსა თუ ბიზნეს საქმიანობაში აბანდებენ. რიგ შემთხვევაში კი მათი საქმიანობა, "ფინანსური პირამიდის" ნიშნებსაც ატარებს. ამასთან, ეს კომპანიები სებ-ის ზედამხედველობის მიღმა ოპერირებენ.

„ბოლო პერიოდში ბაზარზე გამოჩნდა ისეთი  კომპანიებიც, რომლებიც თანხის მათთან დაბანდების სანაცვლოდ მომხმარებლებს სხვადასხვა ორგანიზაციებში აღებული სესხების დაფარვასაც სთავაზობენ. კომპანიები ასევე ავრცელებენ არასწორ ინფორმაციას, თითქოს ისინი ლიცენზირებულნი არიან საქართველოს ეროვნული ბანკის მიერ“, - წერს მთავარი ბანკირი და მოსახლეობას მოუწოდებს. თანხების დაბანდებამდე, გამოიჩინონ განსაკუთრებული სიფრთხილე და მიიღონ გონივრული და ინფორმირებული გადაწყვეტილება.

კობა გვენეტაძე იმასაც აღნიშნავს, რომ შეთავაზებული მაღალი სარგებელი, სხვა თანაბარ პირობებში, გულისხმობს მაღალ რისკს, ამიტომ, მომხმარებლებს უკვე გაფორმებული ხელშეკრულებების გადახედვისა და იმის გარკვევისკენაც მოუწოდებს ვის ანდობს დანაზოგს.

აღსანიშნავია, რომ  მომხმარებელთა დაცვა და ფინანსური განათლების ამაღლება ეროვნული ბანკის პრიორიტეტებს შორისაა და სებ-ი კამპანიასაც აწარმოებს მოსახლეობაში ფულის გონივრულად დაზოგვის კულტურის ამაღლებისთვის.

ამ მიზნით, სებ-მა  გერმანული შემნახველი ბანკების ფონდის საერთაშორისო თანამშრომლობისთვის (SBFIC) მხარდაჭერით, შეიმუშავა სატელევიზიო, რადიო და ინტერნეტ სივრცისთვის განკუთვნილი ვიდეო და აუდიო მასალა, რაც ხელს შეუწყობს საყურადღებო ინფორმაციის მიზნობრივ სეგმენტამდე ეფექტურად მიტანას: