თბილისი (GBC) - ნენსკრას ჰიდროელექტროსადგურის პროექტის შესახებ ყველა ინფორმაციის მიღება ახალი ვებგვერდით -www.nenskrahydro.ge გახდა შესაძლებელი. 

 სს „ნენსკრა ჰიდროს“ ცნობით,  პორტალზე, ქართულ და ინგლისურ ენებზე, განთავსდება ინფორმაცია პროექტის შესახებ, მისი ბუნებრივ და სოციალურ გარემოზე ზემოქმედების (გზშ) ანგარიში და სხვა.ა

ამოქმედდა  გასაჩივრების მექანიზმის ონლაინ-ფორმაც. გასაჩივრების მექანიზმის მიზანი იმ საჩივრებზე რეაგირებაა, რომლებიც შესაძლოა, გაუჩნდეთ ადამიანებს, რომელთაც პროექტი უშუალოდ ეხებათ.

შეგახსენებთ, სს „ნენსკრა ჰიდრო“ კორეული სახელმწიფო კომპანია K-Water–ისა და სს „საპარტნიორო ფონდის“ თანამშრომლობის შედეგად 2015 წელს შეიქმნა. მის მიზანს მესტიის მუნიციპალიტეტში, მდინარეების ნენსკრასა და ნაკრას ხეობებში მაღალკაშხლიანი ჰიდროელექტროსადგურის - ნენსკრა ჰესის მშენებლობა წარმოადგენს. ჰესი საქართველოს ყოველწლიურად 1.2 გიგავატ/სთ ელექტროენერგიას მიაწვდის, რომელიც მთლიანად ადგილობრივ ბაზარს მოხმარდება.