თბილისი (GBC) - მიმდინარე წლის 7 თვეში სახელფასო ხარჯი, წინა წლის შესაბამის პერიოდთან შედარებით, 8,7%-ით გაიზარდა, - სტატისტიკა საშემოსავლო დეკლარაციების ინფორმაციის ანალიზზე დაყრდნობით ფინანსთა მინისტრის მოადგილემ წარადგინა. 

ნიკოლოზ გაგუას თქმით,  საანგარიშო პერიოდში,  სახელმწიფო სექტორში სახელფასო ხარჯი 0,6%-ით შემცირდა, ხოლო კერძო სექტორში 12%-ით გაიზარდა. 

მინისტრის მოადგილე პოზიტიურ ტენდენციად აფასებს ხელფასების ზრდას, კერძოდ, მეორე კვარტალში 10%-იან მატებას.

"ამავე პერიოდში ბიზნეს სექტორმა 30 ათასი ახალი სამუშაო ადგილი შექმნა", - განაცხადა გაგუამ და აღნიშნა, რომ ეკონომიკურ ზრდას მნიშვნელოვნად შეუწყო ხელი საგარეო ვაჭრობის გაუმჯობესებამ, ასევე ტურიზმიდან შემოსავლებმა, რაც  29.1%-ით გაიზარდა და 1,859.6 მლნ აშშ დოლარი შეადგინა.