თბილისი (GBC) – საქართველოში არსებული ფისკალური დისციპლინის ეფექტურობა, საჯარო ფინანსების აღრიცხვა, ადგილობრივი თვითმმართველობების როლი ფისკალური კანონმდებლობის დაცვაში და სხვა აქტუალური საკითხები განიხილეს პარლამენტში, სადაც  საფინანსო-საბიუჯეტო კომიტეტის თავმჯდომარემ  სავალუტო ფონდის (IMF) ტექნიკური დახმარების მისიის ხელმძღვანელს ტორბენ ჰანსენს და მისიის წარმომადგენლებს უმასპინძლა.

შეხვედრაზე ასევე განიხილეს ეკონომიკური თავისუფლების აქტით გათვალისწინებული წესების პრაქტიკაში განხორციელების შესაძლებლობები და  ის შედეგები, რომელიც  მოსალოდნელია ფაქტიურ მაჩვენებლებში გადახრის შემთხვევაში დადგეს.

როგორც ირაკლი კოვზანაძემ განაცხადა, საქართველოს ეკონომიკის განვითარებისთვის  მნიშვნელოვანია IMF-ის ტექნიკური დახმარების მისიასთან თანამშრომლობა და იმ რეკომენდაციების გათვალისწინება, რომელიც მისიამ ფისკალური დისციპლინის გასაძლიერებლად შეიმუშავებს.