თბილისი (GBC) - Fitch - მა საქართველოს სუვერენული რეიტინგი დაუდასტურა - საკრედიტო რეიტინგი “BB-“ დონეზეა, პროგნოზით “სტაბილური.

გავლენიანი სააგენტო საქართველოსა და საერთაშორისო სავალუტო ფონდის ახალ, 3 წლიან  პროგრამაზე აკეთებს აქცენტს, რომლის ფარგლებში ფონდმა, მთავრობის რეფორმების მხარდასაჭრად,  „გაფართოებული დაფინანსების მექანიზმის" პროგრამის ფარგლებში გამოყო  201,4 მლნ SDR (დაახლოებით $285 მლნ), ანუ სსფ-ში საქართველოს ქვოტის 100 % -ის ტოლი თანხა.

Fitch-ის შეფასებით, სსფ-ს ახალი პროგრამა გახდება მაკროეკონომიკური პოლიტიკის საწყისი, რაც პოტენციურად გაზრდის ნდობას მთავრობის რეფორმების მიმართ, თუმცა წინა პროგრამის დროს წარმოქმნილი სიძნელეები პოტენციური საფრთხის მანიშნებლად რჩება.

Fitch-ი საქართველოს ეკონომიკის ზრდის მაჩვენებლებსაც მიმოიხილავს და აღნიშნავს, რომ წელს ქვეყნის რეალური მშპ საშუალოდ, 4.5%-ით გაიზრდება და ასეთივე ზრდა შენარჩუნდება მომდევნო 2 წლის განმავლობაშიც. ინფლაციის პროგნოზი წელს 5.6%-ია.

სააგენტო აღნიშნავს, რომ საგარეო დაფინანსება ძირითად სისუსტედ რჩება.  მიმდინარე ანგარიშის დეფიციტი 2016 წელს მშპ-ს 13.5% იყო, წელს მოსალოდნელია, რომ 11.3%-მდე შემცირდება.