თბილისი (GBC) - სავალუტო ფონდი სრულად იზიარებს მთავრობის 4 პუნქტიან გეგმას, რაც უპრეცედენტოა, - ამის შესახებ საქართველოს პირველმა ვიცე-პრემიერმა, სავალუტო ფონდის მისიის შემაჯამებელ ბრიფინგზე განაცხადა.

"ეს არის საქართველოსთვის უპრეცედენტო ფაქტი, როდესაც სავალუტო ფონდი სრულად ეთანხმება ქვეყნის პოლიტიკური ხელმძღვანელობის რეფორმების პროგრამას და მის ხედვებს ეკონომიკურ პოლიტიკასთან დაკავშირებით,“ - აღნიშნა პირველმა ვიცე-პრემიერმა და დასძინა, რომ მთავრობამ შესძლო „ახალი, ზრდაზე ორიენტირებული ფისკალური მოდელის შექმნა, რომლის მიზანი ეკონომიკური ზრდა და მაკროეკონომიკური სტაბილურობის გაძლიერებაა“.

დიმიტრი ქუმსიშვილი ამბობს, რომ ფონდის მიერ პირველი მიმოხილვის ნოემბერში დამტკიცება  სსფ-ს მხარდაჭერაზე მიუთითებს.

ფინანსთა მინისტრი მიიჩნევს, რომ 4.5%-იან ზრდაზე დაგეგმილი 2018 წლის ბიუჯეტი ქვეყნის მაკროეკონომიკურ გარემოს გააუმჯობესებს.  ეკონომიკაზე დადებითად აისახება გაზრდილი კაპიტალური ხარჯებიც. მისი თქმით, ბიუჯეტის ძირითადი პარამეტრები შეესაბამებმა სსფ-ს პროგრამას, მათ შორის ბიუჯეტის დეფიციტი 3%-ზეა დაგეგმილი.