თბილისი (GBC) - ლიბერთი ბანკის მფლობელების ცვლილება ბანკის საკრედიტო რეიტინგზე არ აისახება, - აცხადებს Fitch Ratings-ი.

სარეიტინგო სააგენტოს ცნობით, ბანკის საკონტროლო პაკეტის (74. 64%) ნიდერლანდურ European Financial Group B.V.-ს (EFG) მფლობელობაში  გადასვლას ბანკის საკრედიტო რეიტინგზე (LB, B + / Stable / b +) გავლენა არ ექნება.

სააგენტო აღნიშნავს, რომ ლიბერთის აქციათა 74.64% -ის მფლობელი ბენეფიციარი პირები არიან ირაკლი რუხაძე, ბენ მარსონი და იგორ ალექსეევი. ამ დრომდე ბანკის აქციათა 58%-ზე მეტი დაყადაღებული იყო, გაჭიანურებული სასამართლო პროცესის გამო და ეს საკითხი გადაწყდა.

ამასთან, სააგენტო მიიჩნევს, რომ ბანკის საკონტროლო პაკეტის მფლობელთა ცვლილება შესაძლოა, დაეხმაროს კიდეც ბანკს დაფინანსების მოპოვების ბაზის დივერსიფიცირებისთვის, იმდენად, რამდენადაც ლიბერთის შესაძლოა გაეხსნას წვდომა საბითუმო დაფინანსებაზე, რაც ადრე გართულებული იყო ბანკის აქციების დაყადაღების გამო.