თბილისი (GBC) -  სახელმწიფო უსაფრთხოების სამსახურის სპეცოპერაცია 3 პირის ლიკვიდაციით დასრულდა. დაკავებულია 1 პირი. 

20 საათიან სპეცოპერაციას სპეცდანიშნულების რაზმის წევრიც ემსხვერპლა, დაჭრილია 2 სპეცრაზმელი. 

ოპერაციას თბილისში, ბერი გაბრიელ სალოსის ქუჩაზე  სახელმწიფო უსაფრთხოების სამსახურის კონტრტერორისტული დეპარტამენტი ატარებდა.

სპეციალურ ბრიფინგზე სავარაუდო დამნაშავეების შესახებ ინფორმაცია  არ დაუზუსტებიათ. 

სუს-ის ინფორმაციით, დანაშაულებრივი ჯგუფის წევრები არ იყვნენ საქართველოს მოქალაქები და მათზე დაკვირვება რამდენიმე კვირის განმავლობაში ხორციელდებოდა.

სპეცოპერაცია 221 ნოემბერს გვიან ღამით დაიწყო.  სუს-ის ცნობით, რამდენიმე საათის განმავლობაში, ოპერაციის საწყის ეტაპზე, მიმდინარეობდა მოლაპარაკებები ერთ-ერთ ბინაში მყოფ პირებთან, სამართალდამცველებისთვის   ჩაბარების თაობაზე, რაზეც მათ უარი განაცხადეს.

დანაშაულებრივი ჯგუფის წევრებმა გახსნეს ცეცხლი ავტომატური ცეცხლსასროლი იარაღიდან და ხელყუმბარები ისროლეს. სროლის შედეგად, სუს-ის სპეციალური ოპერატიული დეპარტამენტის ერთი თანამშრომელი დაიჭრა, რომელიც საავადმყოფოში მიყვანის შემდეგ გარდაიცვალა. 

სპეცოპერაციის დროს ადგილობრივი მაცხოვრებლებისთვის მიყენებული ზარალი მათ სრულად აუნაზღაურდებათ.